శ్రీశ్రీ

కుక్క పిల్లా,
అగ్గి పుల్లా,
సబ్బు బిళ్ళా--
హీనంగా చూడకు దేన్నీ!
కవితామయమేనోయ్ అన్నీ!
రొట్టె ముక్కా,
అరటి తొక్కా,
బల్ల చెక్కా--
నీ వేపే చూస్తూ ఉoటాయ్!
తమ లోతు కనుక్కోమంటాయ్!
తలుపు గొళ్ళెం,
హారతి పళ్ళెం,
గుఱ్ఱపు కళ్ళెం--
కాదేదీ కవితకనర్హం!
ఔనౌను శిల్ప మనర్ఘం!
ఉండాలోయ్ కవితావేశం!
కానీవోయ్ రస నిర్దేశం!
దొరకదటోయ్ శోభాలేశం!
కళ్ళంటూ ఉంటే చూసి,
వాక్కుంటే వ్రాసీ!
ప్రపంచమొక పద్మవ్యూహం!
కవిత్వమొక తీరని దాహం!

'మహా ప్రస్థానం' నుంచి.
శ్రీరంగం శ్రీనివాసరావు (1910 - 1983)